«Кешелеклелек һәм инклюзивлыҡ» (элекке «Гандикап Интернешнл») — халыҡ-ара хөкүмәткә ҡарамаған ойошма. Ул 1982 йылда Камбоджа һәм Таиландтағы ҡасаҡтар лагерҙарында ярҙам күрһәтеү маҡсатында ойошторола. Штаб-фатиры Францияла һәм Бельгияла урынлашҡан, ойошторолғандан алып, ул тағы алты илдә филиалдарын асты : Швейцария, Люксембург, Бөйөк Британия, Германия, Канада һәм АҠШ. Был ойошма ярлылыҡ һәм ситләтеү, конфликт һәм афәт хәлендә ҡалған инвалидтарға һәм ярҙамға мохтаждарға ярҙам итеүҙе маҡсат итеп ҡуя. Әле донъяның 60-тан ашыу илендә 3500-ҙән ашыу ялан хеҙмәткәре эшләй.